من هو من الناس غيرك غلطته ترفع رصيده .. قصيدة ( مسموعة ) للشاعر / حامد زيد ,,

القصيدة: المبـــاني


كلمات و إلقاء: حامد زيد


•°°·.¸¸.•°°·.¸.•°®» ........ «®°·.¸.•°°·.¸¸.•°°·.¸.•


جابك الله من غياب ٍ ضيّق صدور المباني ..

قبل لا الوحشه تزعزع بيتك الصلب وتبيده


بيتك اللي من رحلت وكل جدرانه تعاني ..

ماتحمل ينتظر شهرين وعيونك بعيده


الله العالم لو إنك جيت متأخرثواني ..

ماتشوف إلا بقايا من حصاه ومن حديده


من عرفتك وأنت تايه من مواني في مواني ..

وتارك ٍ قلبي مولّع من وقيده في وقيده


ضاعت سنيني أحدّ بهاليالي وتحداني ..

وأنت ماتشبع غياب وما تخاف من النقيده


ودي أتحمد لك الله بالسلامه , مامداني ..

كل ماتوصل برحله ترجع برحله جديده


دام تدري كل وجه ٍ غير وجه الله فاني ..

ياخي أكسب لك ثواب وخاف ربك في عبيده


كان فيني عيب قلي:فيني العيب الفلاني ..

كان هرجي مزعلك في شي قلي: لاتعيده


عيب تصغر في عيوني وأنت برقاب الغواني ..

ليه تستسهل طعوني وأنت خابرني وليده ؟



لعنبوك إن مت بيدك وش يفكك من أخواني؟ ..

لحزنوا ربعي على فرقاي شاللي تستفيده؟



أنت منت اللي عشقته أنت أكيد انسان ثاني ..

ليه صرت بهالبرود وبهالاحاسيس البليده؟



وين حبك للزعل وين العناد الأولاني ؟ ..

وين حنّية زمان وفرحة العمر الرغيده؟



وين ذاك اللي ليا أقبل مايبات إلا بماني ؟ ..

وين راح اللي اليا أقفى مايروح إلا فقيده؟



واحد ٍ من جابه الله بس يامر ويعصاني ..

الوحيد اللي أخاف أزعله وأمشي معه سيده


مابغيت أطيح بيده لين ماربي بلاني ..

ولا أنا لو هي بكيفي مابغيت أطيح بيده


ذاك بس اللي ليا من جيت له لخبط كياني ..

اللي بنظره ينشّف دم قلبي في وريده


قبل أشوفه أجمع له أحلى القصايد والمعاني ..

و إن لقيته ماعرفت أقول له جمله مفيده


ألف مره قبلها أعد القصيده من لساني ..

ولعنبوه إن جيت عنده قمت أخربط بالقصيده


أمدحه وأنا أدري إنه لو تباطاني نساني ..

أنطحه وانا أعرفه مجنون وأفكاره عنيده


من يسوي بي سواتك يالرهيف الاسمراني؟ ..

منهو من الناس غيرك غلطته ترفع رصيده ؟



من يقص جناح طيرك وأنت أعز أنسان جاني ؟..

ليه أخاف رماح غيرك و أنت ضرباتك سديده ؟



إن تبعتك ..أتبعك من طيبي وواسع بطاني ..

ولا أنا لاجيت أكيد انسان تدري كيف أكيده


أقدر أنزع لك ثيابي وألبس ثياب الأناني ..

وأقدر أطلع من عذابي والعب بدورك وأجيده


ومستعد أكسب رهاني لو بغيت أكسب رهاني ..

وأخدعك بإحساس كاذب وأتحدى من يصيده


أبك أنا لا شفت خلّي حط غيري في مكاني ..

والله إني لتركه وأصد و أعشق سيد سيده


جيت مابيك تحقرني جيت أبيك تعز شاني ..

جيت أبي فزعة ظلوعك من مشاعرك البليده


خلني داخل حدودك وأجبر بخاطر زماني ..

أكذب بباقي وعودك وأصدق بلحظه سعيده


أنتشلني من برودك لو تولّع بالمحاني ..

عطني إحساس بوجودك وأخذ كل اللي تريده


تكفى واليا قلت : تكفى بيع خلق الله عشاني ..

لاتضيّع من يديني فرصة العمر الوحيده


يعلم الله شفت منك ومن غيابك ماكفاني ..

كان ماتقدر تخفف هم قلبي لاتزيده


شف غيابك وش مسوي بالصدور وبالمباني ..

وأنت تدري كيف كانت صدمة غيابك شديدة


والله أنك لو وصلت البيت متأخر ثواني ..

ماتشوف إلا بقايا من حصاه ومن حديده









[لا يسمح للزوار بمشاهدة الروابط. اضغط هنـا للتسجيل...]..








..

المشاركة الأصلية بواسطة بــنـوته قمر يسلموووووووو يا واثق الخطوة

المشاركة الأصلية بواسطة بــنـوته قمر صج قصيدة في قمة الروعه يعطيك العافية